إمبارح دخلنا فيلم إبراهيم الأبيض في سيتي ستارز
هو كان من أفضل الاختيارات إلي موجودة أمامنا ، و ده طبعا راجع للمستوى العالي للأفلام المصرية فالسينما ، عموما أحمد السقا برضو من الممثلين إلي تثق في أفلامهم و تبقى متشجع تدخلها

عموما، أنا كنت سمعت أكتر من رأي عن الفيلم، معظمها كانت أراء مشجعه جدا، إلا إن واحدة صاحبتي حذرتني إن الفيلم فيه مشاهد دم كتيرة و ده طبعا خلاني مترددة لأني لا أتحمل مناظر الدماء حتى لو فرخة

أنا هحكيلكم انطباعي و رأيي الشخصي في الفيلم :
الفيلم فعلا تميز جدا في الإخراج، والتصوير كمان ، يديك إحساس إنك مش بتتفرج على أي فيلم مصري عادي، لا ده فلم معمول بكفاءة عالية جدا و بمستوى محترف فعلا، التصوير و الإخراج كان ممتاز بدرجة كبرى، و ده من أفضل الأشياء إللي في الفيلم و تخليك مستمتع بمشاهدته
الموسيقى التصويرية، رائعة بجد، الظريف إن أنا في الأول مكنتش مركزه معها ولا واخدة بالي منها أصلا، لغاية ما بدأت أنتبه إن إلي بييحركني مع الأحداث و بيغير في إحساسي  بكل مشاهد في الفيلم هي الموسيقى دي فعلا، تأخذك من إحساس لإحساس تاني و أنت معها طول الوقت ، و أعتقد إن ده فعلا المطلوب من الموسيقى التصويرية الناجحة لأي فيلم
القصه: مش قصة قوية تشدك، قد ماهي سرد لواقع عايشينه ، فممكن تحس في وقت إنك مش عارف هو في إيه بظبط، لكن هو زي ماقلت سرد لحقيقة موجودة و للأسف في حياتنا

نتكلم عن أبطال الفيلم، الناس الكبيره بقى
أحمد السقا : كالعادة متميز ، بيقوم بدوره بمهاره و إتقان ، و الشيء إلي فعلا يميزه عن أي ممثل تاني في أفلام الاكشن إنو بيعمل كل حركة بنفسه عمره مستخدم دوبلير أو ممثل بديل يعني ، و ده مكنتش قدرة أصدقه في مشهد الحريقة و بكده فعلا يستاهل كل تقدير
الرائع محمود عبد العزيز : الرجل ده كان رهيب فعلا ، فسواء كنت بتحبوا أو لا (أنا عن نفسي مش كل أفلامه و أدواره بحبها ) لكن هو فعلا كان رائع و متميز جدا جدا في دوره في الفيلم ، يكفي إنه كان بيخلينا نضحك على كلمة ظريفه أو تعليق له رغم إن الجو العام للفيلم مش كده خالص
أنا خارجة من الفيلم منبهرة جدا بيه بصراحه ، فعلا ممثل رائع
عمرو واكد : من الممثلين إلي أنا مش غاوياهم أوي لكن فعلا كان مناسب جدا للدور بتاعه و أداه بمهارة و كان ممتاز فيه برضو جدا ، و في رأيي هو من أجمل الأدوار إللي هو قام بيها  بكفاءة كدة و يخليك  معجب بيه جدا، و تعبيرات وجهه فيه كانت حقيقية و معبرة للغايه
هند صبري : قامت بدور بنت فتوه و مش سهلة، كانت كويسه فيه، بس بصراحة ماحسيتش إنها متميزة أوي، يعني حسيت إن هي هند صبري مش أكتر

الفيلم زي ماقلت من نوع الاكشن و عنيف والأسوأ من كده إنه دموي جدا جدا جدا جدا بشكل متعب للأعصاب ، فعلى الرغم من إني معجبة بكل إللي فات ده، إلا إني طلعت مخنوقة جدا من الفيلم من كمية الدم إللي فيه، والعنف والحقيقة إللي تكتشفها من أحداث الفيلم و هي إن الأجواء دي موجودة فعلا في بلدنا، و إن العشوائيات مليانة بلاوي و بلطجية و دم سايل للركب على طول و كل ده عشان خلافات على مخدرات و أسلحة و حاجة في منتهى الضياع بصراحه الحقيقة مؤلمة فعلا ، و حاسه إن مهما كان فماحدش هيكون عايز يشوفها مع كمية الدموية الصعبة دي

شايفة برضو إن الفيلم كان المفروض يكون مصنف إنه للكبار فقط ، لأن مافيش أطفال يقدروا ولا ينفع أصلا إنهم يشوفوا العنف ده ، و بالتالي ده لايعتبر فيلم عائلي طبعا
برضه لا يصلح لذوي القلوب الضعيفة أو حتى المتوسطه ، و لا للناس إللي بتدخل سينما للفرفشة ، حلو للشخص الدموي واللي غاوي عنف و يشوف الحقيقة المؤلمة للعشوائيات اللي في بلادنا

لكن أنا الحمد لله اليوم امبارح عموما كان ممتع جدا بالنسبه لي، والصحبه كانت هايله ، و شكرا