النهارده الصبح، سمعنا كلنا خبر وفاة حفيد الرئيس “محمد علاء مبارك

الدوام والبقاء لله، ربنا يرحمه و يصبر أهله على مصيبتهم – مهما كانوا ظلمه أو سبب في الفساد فالموت أكبر من أي حد و مهما كان ده ميدنيش الحق اني اشمت او افرح في مصيبتهم !

صح ان في ناس غلابه اولادهم ماتوا من الفقر او انهم مش لاقيين العلاج ، وان في ناس ما يعلم حالها الا الله من كتر الظلم اللي عايشين فيه….

بس هل ده كله يديني الحق اني اشمت في مصيبتهم؟ او اني افرح بعذابهم و الامهم؟

انا اتمنى ان يكون الابتلاء ده عظه للظالم من اهل الميت، و يكون سبب في هدايتهم، ويحس فعلا ان الدنيا فانيه و الدوام فيها لله وحده

لكن أقول يستاهل، و أحسن عشان ظلمه ،و كويس ان حد منهم مات، عقبال الباقي ،ولا اللي زعلان ان الولد اللي بيموت صغير ده بيشفع لاهله ويدخلهم الجنه!!!!

اييييييهههه هو فيه ايه، الموت ده ابتلاء لا ينفع فيه شماته ولا ينفع حتى اتمناه لحد، ومين احنا عشان نقول ان ده عقاب من ربنا ليهم، ، مش جايز يكون سبب للعظه، و ممكن برضه يكون عقاب الله أعلم، احنا منعرفش الغيب ولا نعرف حكمة ربنا في ابتلائهم بموت الولد ده ايه؟
انا سمعت كمية تعليقات من شماته او فرحه و سخريه في مصيبتهم صدمتني جداااااا ، مينفعش أقول احسن وللا يستاهلوا او ربنا ياخدهم !!

مش بقول طبعا انهم غلابه ولا ملايكه و طيبيين، لكن مش لاقيه سبب يديني الحق اني اكون فرحانه فيهم!!
الرسول صلى الله عليه وسلم ماكانش بيتمنى الاذى او الموت لاي انسان > وكان يدعيلهم بالهدايه، و علمنا ان لما نكون مظلومين نقول “حسبنا الله ونعم الوكيل”  وحرام اني ادعي على حد أو اشمت في مصيبة حد

ربنا يصبرهم و يجعل المصيبه دي سبب في هدايتهم و رجوعهم عن مساوئهم

و إنا لله و إنا اليه راجعون