مع استمرار الضرب والقصف اللي بقى برا و بحرا و جوا على قطاع غزة, كل واحد فينا بيحاول قدر المستطاع انه يعمل أي حاجة ولو بسيطةلمساعدتهم, خصوصا مع الوحشية اللي بيتعاملم بيها واللي تنافي أي أخلاق أو توفر أبسط معاني الانسانية
طبعا كل واحد فينا يوميا بيستقبل عشرات الرسائل ,المقالات و الدعوات اللي بتنادي بنصرة أهل غزة سواء بالدعاء أو التبرع أو أي وسائل أخرى ممكن تساعدهم ولو بأبسط الأشياء
من الأشياء دي هي المقاطعة للمنتجات الأمريكية أو الأوروبية اللي بتساند اسرائيل
المقاطعه في حد ذاتها سلاح قديم للضغط و للاعتراض وايصال رسالة اننا لن نرضخ للهمجية والعنف ونقبل بسفك الدماء وهذه -المقاطعة- واحدة من الطرق و فعالة الى حد كبير فعلا
أنا مقتنعه بالمقاطعه و تأثيرها, ومش ده موضوعي الفعلي
النقطة اني لما شفت القائمة اللي فيها منتجات الشركات دي, اتصدمت واللهي وأول حاجه قلتها “طيب ناكل و نشرب ايه, دي كلها منتجات بنستخدمها يوميا في أبسط الأشياء” وبعدين
….. !!
عايزين نقف لهم بالمرصاد… لازم نقاطع …. أوك مفيش مشكله, هنقاطع
لكن فين البديل!!!
في حاجات ممكن الاستغناء عنها نهائيا (زي المشروبات الغازيه والمأكولات السريعة) هي كده كده مضرة , في المقابل في حاجات تانية من المنتجات دي لا يمكن الاستغناء عنها لأن مالهاش بديل من شركات تانية, ولو اتوجد فللأسف بيكون في مستوى أقل كتيير عن المستخدم من الشركات اللي المفروض نقاطعها !!!
طيب وبعدين, ماهي كده فضيحه, احنا معندناش انتاج يحققلنا اكتفاء و يغنينا عن الشركات التانية, فين الانتاج المصري, بلاش……. فين الانتاج العربي؟؟؟
حاجة تحير بجد, ولو لقينا انتاج محلي هتظهر المصيبة الأكبر و هي جودة الانتاج ده
لدرجة ان لو حبيت تقارن بين نوع شوكولاته مثلا (لأي شركه أجنبية ليها فروع في الوطن العربي) قارن طعمها و هي مصنعة في مصر و لو هي مصنعة في الامارات أو السعوديه
طبعا هناك فرق, بس لييييه؟؟
ماهي نفس الشركة, نفس المقادير, نفس الأجهزه و نفس المعايير
أمال الفرق اييه, الأيدي العاملة ولا الضمير ولا ايه؟
مش قادرة أفهم ليه مفيش عندنا جوده عاليه, و مش هطالب بانتاج محلي لكن على الأقل في اللي بيتصنع عندنا !!
ومش عارفه هل هقدر أقاطع فعلا كل المنتجات دي, أنا معنديش مانع و نفسي فعلا, بس عايزة بديل كويس
لأن اللي احنا فيه ده بجد حاجة تكسف
هوندا Said:
January 5th, 2009 at 10:05 pm
فعلا والله لانهم للاسف بيحققو المبادىء الى ديننا بينص عليها من اتقان واحنا هنا بنتفنن فى الكروته على فكرة كل حاجة
من دى مش متوفرلنا اعتقد انها فرض كفاية لو متعملش كلنا نتحاسب عنه ولو فرد عمله اسقطه عننا
كمان المشكله ان اغلبنا مبقاش يفضل المنتج المحلى ولا عنده استعداد يجربه ودى مشكله تانيه
:S
Manar Said:
January 5th, 2009 at 10:19 pm
جميييييييييل جدا الموضوع يا سينار
وطريقه زكيه فعاله جدا لدفع الناس للمقاطعه
ولو احنا قاطعنا المنتجات دى فعلا مش هنلاقى حاجه نشتريها ليها نفس الجوده والقيمه بتاعتهم
بس افتكرى ازاى الناس فى غزه دلوقتى بياكلوا وبيشربوا ويعيشوا هاتعرفى انه حتى لو اشترينا الاقل جوده وكفاءه هايكون برضه حالنا احسن من حالهم بكتيييييييييييير
وانا شايفه ان فعلا لازم نجرب ايللى هما فيه دلوقتى وايللى مش هانقدر نوصل ليه مهما عملنا
بالنسبه لموضوع الشيكولاته بقى فأعتقد ان الفرق فى التلاته ايللى قولتيهم
فى المقادير
فى الاجهزه
فى المعايير
انتى عارفه طبعا مصر أم الدنيا يستحيييييييييل تبقى شبه اى حد فى اى حاجه
بس شكرا ليكى على الموضوع وانتى اخدتى ثواب المقاطعه حتى لو ماقدرتيش تقاطعى كل المنتجات
الدال على الخير كفاعله
Butterfly Said:
January 6th, 2009 at 11:29 am
والله عندك حق أنا برده قلت الكلام ده ساعه لما شفت القائمه دى …
البدائل بجد جربناها وطلعت مش بالجوده .. المفروض الناس بقى اللى بتشجع على المقاطعه تعرف ده .
بس فى حاجه تانيه احنا لو بدأنا فعلا نشترى الحاجات دى طبيعى ان الناس اللى بتصنعها هتحاول تحسن فيها كل فترة والتانيه …!
زى أى منتج بيتعملوا تجديد كل فترة .!
Sinar Shebl Said:
January 6th, 2009 at 1:51 pm
كلام جميل و كلام معقول مقدرش أقول حاجة عنه
لكن بصراحة أنا من امبارح بفكر في وجهة نظر مختلفة شوية
هنقاطع, وفرضا هنلاقي البديل بأي جودة كانت أو حتى هنتنازل عن المنتج ده و نستحمل
الفكرة بقى في الشركات اللي عندنا (صاحبة الاسم الاجنبي) لما هنقاطعهم عشان الشركة الأم متمولش اسرائيل طيب مش كده الفرع اللي عندنا هيتأثر, قصدي ان فيه عمالة وأيادي و بيوت كتيرة مفتوحة من ورا الشركات دي…
مش ساعتها خسارتهم هتأثر على الناس دي, وممكن تقفل بيوتهم و تبقى مشكله كبيرة ؟؟؟
أصل انتم متخيليين في عمالة قد اييه فعلا موجودة في الشركات دي, كتيييرر جداااا
يا ترى موقفهم ايه؟
Butterfly Said:
January 7th, 2009 at 4:30 pm
برده نظريه
بس عارفه دى عامله زى اللى ملقاش شغل وراح اشتغل فى كباريه ولا حاجه
لما نيجى نقول هنقفل الكباريه نرجه فى كلامنا عشان اللى بيشتغلوا فيه ؟!!!
هتقولى بس ده مش كباريه ومش حرام .. بس لما يبقى فى الوقت الراهن الناس دى بتضرنى يبقى المفروض اللى بيشتغلوا دول يحسوا باللى بيحصل ويسيبوها من نفسهم …!
دى وجهة نظرى … والله أعلم
ayman Said:
January 13th, 2009 at 2:37 pm
yes ya sinar ya have right wlahe , ana kont wa7ed men el nas 2le m2t3ah bas le le 2saf d3eft showyah bas hrga3 tane isa
we about el quality fa manar m3aha 7a2 we 2alet el mofead
slam