امبارح كنت في مشوار في شارع مكرم عبيد
وانا ماشية في شارع جانبي …. كان فيه عربية السواق بيحاول يركنها طوليا بين عربيتين
يعني الركنة من النوع ده مش دايما بتكون سهلة لاي حد ، خصوصا لو المكان ضيق…
الراجل و هو بيرجع بضهره بالعربية…. خبط العربية اللي وراه .. اآه خبطها بس معلش المكان فعلا ضيق و صعب انه يركنها بسلام ، انا قلت في بالي معلش هيمشي بقى و يشوف مكان تاني يركن فيه بدون خسائر
الكارثة في ان الراجل ماوقفش، ولا اتحرك من مكانه، او هو بصراحة فضل يتحرك للخلف اكتر، فمش بس بيخبط العربية اللي وراه ، لا ده كمان بيزقها لورا اكتر و اكتر من باب انه يوسع لنفسه مكان !!
بجد وقفت ابصله و انا في حالة ذهول، تنحتله فعلا، الراجل بصلي باسلوب “في حاجة يا شاطرة” كنت عايزة اتخانق معاه، ازعق اعمل اي حاجة
و ندمت بجد اني مش معايا الكاميرا اصوره عشان احطها دليل هنا 
انا عارفة ان الركنات للعربيات سخيفة جدا، و تقريبا مافيش اماكن نهائي، واللي بيركن مش شرط ابدا يراعي انه يسيب مكان لحد يركن جنبه او وراه … من باب انه لقى ركنة و السلام..
لكن هل يعقل بجد ان ده يبقى اسلوب ؟؟؟
يعني اخبط في عربيات الناس عشان هو مش سايب مكان كفاية أو عشان انا مش لاقي مكان اركن !!
انا فضلت افكر ان لو عربيتي اللي اتعمل فيها كده، احساسي لما انزل الاقيها مركونة و مخبوطة في مكانها
شئ مستفز
وغير مبرر بجد
ماهي اصلها مسألة اخلاق … مش مسالة زحمة مرور ولا كتر عربيات
مسألة اخلاق ، و مابقاش فيه اصلا اخلاق لا في السواقة ولا في الركنة و لا في اي حاجة تانية
وعجبي
Ahmed Soliman Said:
February 23rd, 2010 at 9:02 pm
هي فعلاً مسألة اخلاق و احساس و ده اصبح شبه معدوم و خصوصاً مع الناس اللي معاها عربيات مش خايفة عليها ، يعني من باب اللي خايف على نفسة يوسع
نفس في يوم اشوف حد يدرك ان مسأله المرور دي مأسآه قومية و محتاجة مشروع وطني لان حجم الخسائر الماديه و البشرية رهيب جداً و احنا اساسا شعب فقير يعني نتلم و نتعلم نسوق عشان كلنا نوفر و البلد توفر فلوس و انتقدم بقا
Mohammed Safwat Said:
February 23rd, 2010 at 9:04 pm
موقف مشابه حصل لما كنا فى Cairo ICT
كان فى واحد راكن صف “ثالث” بالطول برضه والأتوبيس بتاعنا مش عارف يطلع, قمنا شايلين العربية من مكانها و حركناها بعيد علشان الاتوبيس يعرف يخرج من الموقف!
هى فعلا مسألة أخلاق!وطالما معندناش أخلاق, عمرنا ما هنتقدم, وأنا شايف اننا مش هنتقدم ولو بعد 100 سنة..
هوندا Said:
February 23rd, 2010 at 11:00 pm
اه والله فعلاً انا ديماً أفكر هل لو القانون اتطبق صح الزحمة هتختفى ابداً لان مشكلتنا فى الأخلاق مش فى القانون :S
كريم علي Said:
February 24th, 2010 at 9:39 am
عندك حق طبعا تستغربي .. والجميل إننا نشوف الدول التانية بتعمل أيه في حاجة زي كدة !
قانون المرور هنا في السعودية مثلا صارم جدا .. هل نعرف إن اللي بيكسر الإشارة ويمشي بعربيته بيتحبس هنا في السعودية؟
طبعا قرارات زي كدة ممكن تبان تعسفية من الظاهر وأكيد ناس بتتخطى القوانين دي .. لكن ده لا يمنع إن الأغلبية العظمى من الشعب السعودي والمقيمين هنا إتعلموا القوانين دي وبقيت شيء تلقائي عندهم !
واحد صاحبي نزل أجازة من شهرين مصر .. أجر عربية عشان يقضي بيها المشاوير وكدة .. عادي جدا ! ماشي بالعربية وقف في إشارة حمراء !! عادي جدا؟
لأ !! إتشتم هو وأهله واحد واحد !! ولما إستغرب وبص لعسكري المرور .. كان الرد كوميدي بجد .. قاله هو أنا قولتلك متمشيش؟! ما كله ماشي
وبصراحة الجميل إنكم واخدين بالكم من حاجة زي كدة في أداب السواقة !! بصراحة أنا لما كنت عايش في مصر وأنا بسوق من وأنا عندي 14 سنة تقريبا لحد ما طلعت رخصة السواقة لحد ما سيبت مصر مكنتش أعرف يعني إيه إلتزام بحارة مرورية !!! عمري ما كنت سمعت عنه أصلا !! إلا لما سافرت برة !
بصراحة عندك حق الموضوع موضوع أخلاق وإحساس بالمسؤولية سواء من الناس أو من رب البيت
BooDy Said:
February 24th, 2010 at 12:48 pm
اها .. انا برده عايش مأساه هنا ..
الشارع ضيق و كل يوم الصبح في اتوبيس بيعدي بسرعة و يخبطله عربيتين تلاتة في الشارع
وعربيتنا اتبهدلت من كل الاتجاهات وهيا مركونة …
hosamsaber Said:
February 24th, 2010 at 3:08 pm
على فكرة انا كنت انبارح فى نفس الشارع وشفت حاجة اغرب واحد كان ماشي بعربيتو ورا واحدو والطريق كان واقف المهم سرح ولا اية راح خابط فيها وانا قاعد اتفرج اية اللى هيحصل مفيش حد اتحرك الظاهر الاتنين كانو سرحنين والخبطة كانت باينة وظاهرة الحمد لله مشيت وسيبتهم الظاهر ان الناس كلها بقى فية لا مبالاه عجيبة او خدمه نفضلى شكرا من فودافون . الحمد لله يا سينار انك كويسة بعيدة عن الخبطة دى وبعد كدة متبقيش تبصى لحد عشان ميقولكيش امشي يا شاطرة تانى لووول
Manar Helmy Said:
February 24th, 2010 at 4:39 pm
dيا خبر … دا فعلا تصرف مستفز جدا جدا
انا فعلا والله لو كنت مكانك كنت اتخانقت معاه حتى لو كانت دى مش عربيتى
او احاول اخللى كل الناس ايللى فى الشارع يلاحظوا ايللى هو بيعمله