من تلات شهور تقريبا ، احمد فاجئني بعرض فرصه تدريب ليه في الشركه اللي هو فيها – ثيب تكنولوجي – لان كان في فريق جديد بيتكون و محتاجين ناس و في نفس الوقت مش محتاجين خبرات كبيره و ده في مصلحتي ، لاني للاسف مش عندي اي خبره فعليه ،.
العرض كان مفاجئ بالنسبه لي ، و ماكنتش متحمسه اوي في البدايه ، لاني كنت مرتبطه مع الاكاديميه ، بس وقتها جاء تاجيل الدراسه مصلحه عشان اقدر افكر و اضبط اموري
المهم انا اتشجعت فعلا ، و رحت عملت مقابله مع مديره الموارد البشريه ، و مدير الشركه ، و الحمد لله كانت ظريفه جدا ، رغم اني كنت متوتره لانها كانت اول مره اعمل مقابله عمل بالشكل ده ، و الحمد لله هما وافقوا على اني ابقى متدربه لمده ٣ شهور في الشركه و على حسب تقييمي في الفتره دي هنشوف اذا كانوا يعينوني او يكتفوا بالفتره كتدريب بس.
بعد المقابله دي ، شعوري اختلف تماما ، بقيت متحمسه اوي للبدايه في الشركه خصوصا اني هكون مع احمد ، نروح سوا و نرجع سوا ، وان كمان ممكن اسافر بلجيكا مع الفريق بتاعي للشركه هناك اللي احنا تابعين ليها ، و فعلا بدات بحماس شديد.
البدايه كانت متعبه شويه ، الشغل من ٩ الصبح ل ٦ مساءا ، فتره مش هينه و خصوصا لربة منزل زي حالاتي، بس كنت نشيطه جدا ، ارجع اعمل اللي ورايا و اجهز حاجتي لليوم اللي بعده و هكذا ، و مامتي ربنا يخليهالي و يطولي في عمرها كانت بتساعدني كتيير
كنت فعلا ببقى حاسه بارهاق و تعب شديد بس كنت مستحمله و مبسوطه لاني فعلا كنت مستمتعه جدااا
الشركه ليها جو مختلف ، نظامها ، ادارتها ، تقسيمها ، الناس اللي فيها ، الناس اللي اتعرفت عليهم و اشتغلت معاهم كل حاجه ، والاحلى ان في كتير من الناس عارفاهم زي اصحاب احمد و هكذا
الاحلى بالنسبه لي ، اني بقابل ناس يوميا ، بنتكلم و نهزر و نشتغل و نتناقش ، و دي اكبر ميزه لقيتها ، انا فعلا كنت اشتغلت في الاكاديميه بعدد ساعات محدد و فعلا كانت ممتعه ، بس مش زي جو الشغل في الشركات و التيكنيكال ، الموضوع فعلا مختلف عن التدريس و العمل الاكاديمي
لكن طبيعه الشفل في الفريق اللي انا فيه بدات تظهرلي بعد ٣ اسابيع او اقل كمان ، انه نوع من العمل الروتيني ، و مش النوع كمان اللي ممكن اتعلم فيه حاجه تفيدني اكتر – و ده كان الهدف الاساسي لي من اني اخد فتره التدريب دي – اني اتعلم و انمي نفسي عن طريق الشغل الحقيقي مش من البيت و التعليم المنفرد
لما لقيت كده، بدات احس بالاحباط، واني مش بكون مستمتعه وانا بعمل الشغل المطلوب مني ، و بدات احس بالفتور في حماسي للشغل ،اللي بعمله، و بدا حماسي و نشاطي اللي كنت فيه يقل
بقى شغل البيت تقيل اوي ، لاني فعلا برجع مهدوده و مش قادره ، و التعب ده كمان مش من حاجه انا مستمتعه بيها عشان يكون يستاهل اني اجاهد نفسي فيه.
وقلت هما ٣ شهور و يعدوا ، بس مع قرب انتهاء الشهر التاني من المده دي، لقيت المدير بيكلمني، و انه عايزني اكمل معاهم، لانه سعيد بي و ان تقييمي كويس جدا و الحمد لله واني ابقى في تعيين رسمي مش متدربه و بس.
قعدت فتره كبيره اوي محتاره، قراري محسوم من ناحيه عدم استمتاعي بالشغل – من حيث طبيعته – لكن في المقابل بكون مبسوطه اوي وانا في الشركه ، وانا مع ناس، وانا لي وظيفه و مكان و زمايل عمل ، مبسوطه اني مع احمد و بنتشارك الوقت و الظروف ، بس مش من الصح ان كل المشاعر دي هي اللي تحركني في قراري ، لان على الجانب الاخر ، بدات احس ان صحتى بتتدهور من الارهاق ، قله الحركه ، والمجهود الذهني و البدني و النفسي بتاع كل يوم ، ده غير اني كنت متخيله اني هقدر اتشجع لرساله الماجيستير مع الشغل وللاسف ده ماحصلش و بالتالي اهملتها تماما ، و الموضوع اصلا مش مستحمل
في الفتره الاخيره ، بقيت لما بوصل البيت بكون غير قادره على بذل اي مجهود، لكن للاسف لازم اعمل حاجات كتير ، لاني عارفه ان مش هينفع اني عشان باشتغل اقصر في شغل البيت ، و ده بدا يخليني افكر بطريقه مختلفه ، جايز مش سليمه اوي ، لكن هي فعلا مسيطره عليه في الفتره دي
قراري النهائي هو اني هسيب الشركه ، و ده عشان الشغل مش عاجبني كبدايه – بس الحق يقال ان المدير عرض عليه فرص كويسه لكن مش قبل ٦ اشهر على الاقل – ده غير ان كان قدامي فرصه كمان اسافر و اتفسح و اشوف بلاد بره ، بس الشئ اللي خلاني خلاص مش قلدره اكمل ، هو حمل البيت
مع مرور الوقت مش بقيت بقدر اعمل اللي المفروض يتعمل، و بعمل اقل الاشياء ، و كمان بعملها وانا في حاله يرثى لها من الارهاق و الضيق الشديد ، لالني بقيت حاسه اني هرجع اقعد في البيت عشان اعمل شغل البيت
هرجع اقعد لوحدي تاني ، حتى لو هشتغل من البيت و اذاكر و اشغل وقتي ، بس كل ده ، برضه و انا لوحدي،
انا فعلا ماحاسيتش قد ايه صعب اني افضل مده طويله كده في البيت لوحدي الا لما جربت قد ايه ممتع اني اكون وسط جو عمل و حياه و حركه
بدات احس ازاي فعلا هفتقد ناس كتيير عرفتهم و حبيتهم ، و ناس اتعلمت منهم او بسببهم حاجات كتير اوي
الفكره بقه اني اصبحت ناقمه جدا على شغل البيت والواجبات المنزليه ، و بعملها وانا متهالكه و غضبانه فعلا ، مع العلم اني طول عمري اقول ان شغل المراه مالوش اي قيمه ولا فايده لما ياثر على بيتها و تقصر في مسؤليتها تجاهه ، و الحمد لله مبدآي لم يتغير ، بس خلاني احس اني بكره فعلا شغل البيت ده ، و مسئولياتي فيه.
اكيد الوضع كان هيبقى مختلف كتييير لو الشغل فعلا كان يستحق التضحيه ، وانه فرصه لا تعوض ، بس هومش كده ، وبالتالي قراري ده هو الاسلم و الاصح لكني مش سعيده اوي بيه
طبعا مش لازم اصلا اكون سعيده ، لان الاصل هو المصلحه مش السعاده
عارفه ان ممكن ناس تكون شايفه شعوري ده فيه شئ من المبالغه او التراجيديا ، و ممكن يكونوا على حق ، و ممكن يبداوا يرصوا لي مزايا القعده في البيت و يذكروني بالارهاق اللي بكون فيه من الشغل ، بس شكرا ليهم ، انا في غنى عن كل ده
انا بكتب لانفس عن ما بداخلي ، حتى و ان كان فيه شئ من المبالغه بس هذا ما اشعر بيه الآن ، و عموما هي فتره و هتعدي ان شاء الله
على الاقل خلتني اكثر حماسه للشغل و المشاريع و لاني انتج و انجح و ربنا الميسر
بس بعد كل ده بقى ، فيه سؤال شاغلني من فتره ، هل الحل لاني انزل اشتغل هو الشغل في شركات الحكومه عشان المده تعتبر النص تقريبا ، ولا الشغل من البيت – وهو فعلا من اقوى الحلول الموجوده و الناجحه حاليا – بس الاتنين دول مش هنلاقي فيهم الجو و الروح الموجوده في الشركات الكبيره فعلا ، ولا فيه نظام الاداره المتميز ولا ولا حاجات كتييير تانيه .
مش عارفه ، حاسه اني متغاظه لاني فشلت ، و ماعرفتش اوفق بين الاتنين، و نفسي اسال، هو السيدات اللي بيشتغلوا في شركات كبيره و فترات طويله و شغل من اللي بجد يعني دول بيعملوا اييييييه !!!!! والاكتر كمان لو معاهم اطفال ، ده يبقى ازاي يعني ….. حد يقولي عشان اشوف هل فعلا العيب فيه ولا في ايه !!! و شكرا
asmaa setiete Said:
December 18th, 2009 at 3:10 am
حاسة بيكى والله ياسينار ده انا بس من مجرد نزولى ادى كورسات ” project management by using primavera ”
برجه مرهقة جدا ومش قادة اعمل اى حاجة فى البيت بشتغل فى البيت يوم وبكسل التانى
لكن الغريب انى اختى كسرت المعادلة دى وبصراحة حاولت اكون زيها وفشلت
هيا اولا متزوجة وهى فى تالتة طب جابت احمد وهيا فى رابعة طب وكانت بتذاكر وهيا شايلاه وكانت بتنج بامتياز وجاب منى فى سادسة طب وبرده كانت شايلاهم هما لاتنين ومازالت بتنجح بامتياز
بعدها سافرت لندن مع زوجها وكانت هناك بتشتغل وبتذاكر وجابت عمرو بعد منى بسنتين وبرده كانت ناجحة جدا ومستمتعة بوقتها
وبعد ما رجعت هنا كان يومها كالتالى
بتصحى الفجر تطبخ وتستنى الصبح تفطر الاولاد وكانت بتوديهم المدرسة بعدها تطلع على الشغل وبعدها تروح تجيبهم من المدرسة وترجع تغديهم وتذاكرلهم وبعدها تروح تساعد زوجها المعمل وترجع معاه يتعشوا وتعمل شغل البيت وتذاكر شوية وتنام
الافظع بقه انها جابت الايام دى محمد وهيا فى غرفة الولادة كانت ماسكة كتاب بتذاكر فيه عشان امتحانات التمهيدى
وتخيلى واحدة معاها اربع اطفال من ضمنهم واحد رضيع وطالبة تعمل كل اللى بتعمله مع الطفل الجديد ومع تحضير الماجيستير ومع طلبات البيت وكمان كل المشتريات عليها لان زوجها مش فاضى عشان شغال ما بين معملين واحد معمل وراثة والتانى معمل تحاليل
ومع انى اختها بس برده مش عارفة هيا مازالت بتعمل كل ده ازاى وماشاء الله عليها محافظة على جمالها واناقتها
غير كده قدرتها على التعلم يعنى فى السن ده ومعاها كارنيهات وشهادات دولية واحدة منها فى infection control
ودى حاجة مش متعارف عليها هنا قوى
فالموضوع بس يمكن اصرار شديد على انها تعمل كل ده وبنجاح لان لو شوفتى ولادها مش هتصدقى
ابنها الكبير احمد اتعلم برمجة لوحده من غير اى مساعدة والوقتى فى اولى ثانوى وبيعمل برامج قوية وبارتنر فى شركة it
والباقيين على نفس الدرب
فالقصة اصرار وانك تعودى نفسك على الحياة دى من غير ما تملى بس المهم انك تاخدى يوم او يومين فى الاسبوع راحة وفسحة وتقضى فعلا weekend كويس
ربنا معاكى يارب ودايما فى توفيق ونجاح ياجميل
zeiNab Said:
December 18th, 2009 at 3:53 pm
انا كمان محتاجه رد على السؤال ده هما بيعملو اييييييه بجد ؟
انا فى بكالوريوس هندسه وموضوع الشغل دى مسيطر عليه اشتغل ولا لأ
وكمان انا فى قسم حاسبات ودايما فترات العمل من 9-6 صعب اوووووى
بس انا لو مكانك كنت اخذت نفس القرار …….ربنا يوفقك
Sinar Shebl Said:
December 19th, 2009 at 2:58 pm
@asmaa: بسم الله ما شاء الله
احب اقولك اني فعلا اتعقدت و حسيت فعلا اني فشلت
ربنا يكرمها اختك و يباركلها يا رب في صحتها و اولادها و بيتها….
و ياريت تساليها ايه السر ، عشان انا كده هيجرالي حاجه
شكرا على الرد ده بجد … على قد ما اتعقدت على قد ما انا سعيده ان فيه انسانه كده
Marwa Abd ElAziz Said:
December 23rd, 2009 at 3:36 am
اعتقد ان فى ستات كتير عندها الحيره دى بالذات لما يكون عندها طموح و تعبت فى كليه زى بتعتنا خمس سنين بيبقى صعب بعد كده انها تفكر تقعد فى البيت بس فى نفس الوقت الشغل الكويس فى الوقت هوا شغل الحكومه و ده طبعا اى كلام خاصا للناس اللى عندها هدف مش بتشتغل علشان تشغل فارغها و بس و بصراحه مع انى فى جوزى مكنش ينفع طوال الفتره دى انى افكر انزل اشتغل بس اقعت كتير افكر مع نفسى انا عاوزه ايه و ايه الاهم بالنسبه ليا فاتفحأت بصراحه انى قرارت ان اهم حاجه عندى بيتى و جوزى و انا مقتنعه انوا اكيد لو نظام الشغل من 9 الى 6 اكيد هقصر فى حاجه على الاقل لو رجعت عملت شغل البيت مش هبقى قدره انى اهتم بزوجى و انى احافظ على جو معين فى البيت ده على اساس انوا كمان فى مجالنا انتى محتاجه طول الوقت تطورى من نفسك يعنى كمان بعد وقت العمل و شغل البيت كمان اقعد اذاكر و الست بصراحه قدرتها على الاحتمال مش زى الراجل ده على اساس اصلا ان فى راجل يقدر يستحمل ده طيب ما علينا هنقول الحياه هتمشى طيب لما تجيب طفل ازاى يعنى هى بترجع 6 و هتطبخ و تأكل قولى 8:30 و تغسل الموعين و بقى شغل البيت يبقى 9:30 و ده من غير ما تكون جت نحيت النونو و معطلهش دقيقيه و لازم تنام 12 يعنى هتقعد مع ابنها 2:30 فى اليوم ازاى تربى ابنها فى الوقت ده و يأخذ اللى محتاجه و هتسيبوا مع مين يعنى احنا هنا لا ماما و لا اختى فى النهايه الحياه قرارات و كل واحد ليه وجهت نظر بس بصراحه انا قولتلك فبل كده ولا قرار هيبقى مريح 100% بس هى الدنيا كده محدش بيأخذ كل حاجه
Sinar Shebl Said:
December 24th, 2009 at 4:00 pm
والله عندك حق يا مروه ، المعادله صعبه فعلا
و مش كل الناس تقدر توازنها و تحققها
دي قدرات
وربنا يعينا غلى الخير ايا كان مكانه فين
هوندا Said:
December 29th, 2009 at 8:04 pm
الموضوع ياسينار زى ماقلتلك فيه عدة محاور انتى دامجهم كلهم سوا
1- نوع الشغل مش عاجبك
2- وقت الشغل
3-شغل البيت
لو نوع الشغل كان عاجبك فعلاً وحسيتى بمكاسب كتير منه وانك مستمتعة بيه كان هيخلى عندك قوة دافعة اكتر انك تضغطى وتستحملى الحاجات التانية وده الى حصل معاكى اول ماتحمستى
وقت الشغل صعب صعب واى واحدة بتشتغل فيه لازم يكون عندها قصووور ان مكنش فى بيتها فى حقها هيا شوفى الراجل الى هو قوام اصلا لما بيشتغل افترة دى بيرجع عامل ازاى مابلك الست الى قدرتها أقل من ده
شغل البيت ده المهمة الرئيسية للست زى مامهمت الراجل انه يشتغل وينفق عليها اى حاجة تيجى بعدها بقا لكن مش صح انك تنقمى عليه خالص لان انتى اصلا مش مستمتعة بالشغلانة نفسها
انا مقدرة الوقت الطويل الى بتقعديه لأنى تقريباً بقعده ويمكن اكتر شوية بس انتى قدامك فرص كتيرة صدقينى انتى فى القاهرة فى اماكن كتيرة تقدرى تدورى فيها ع شغل مناسب ليكى او حتى حاجات تطوعية او او
يعنى انا هنا مفتقده الجو ده خالص خصوصا ان طول عمرى فيه
فزى ماقلتلك قبل كده حاوولى تخلقى لنفسك تحدى ومعلش اى اختيار بينتج عنه تضحيات المهم المميزات تكون اكتر وانه يرضيكى
قاعدة البيت مش ساهلة لكن مش صعب انك تقدرى تخلقى لنفسك جوك الخاص
وربنا ييسرلك الى فيه الخير والرضا
sara Said:
January 1st, 2010 at 8:12 pm
بجد بسم الله ماشاء الله على أخت أسماء
ربن يبارك فيها وفى عمرها بس يمكن السر فى انها بتبتدى يومها من اوله من اول الفجر
فالحياة منظمة ومش متلخبطة بالنوم متأخر والصحيان متأخر لأن فعلا اليوم بيكون فيه بركة رهيبة لما الواحد بيبتديه من الفجر وربن بيعين وبيبارك لأن برضه الأرزاق بتوزع الفجر
يارب اكون زيها لما اتجوز لأن نفسى اكون كده بالاضافة انى أحفظ اولادى القرآن
Dodo Said:
January 26th, 2010 at 11:28 pm
Bossy Ya Nanno , I Spent 14 hours 2 day @ work , its hard when you have a live , its easy when you don’t , ya3ny aked el wad3 mo5talef bel nesba leki 3ashn a7med wel beet we isA el nono
, fakkary feha keda .. eh eli bey7sal lama yekon fe delivery ( aw deadline) @work and for some reason u are late , u r required to go 2 work on weekends , spend extra hours bla bla bla , imagine ba2a enek lesa 3ayza terawa7i 3andek sho’3l beet …. 7aga sa3ba ..
w a7med hena !!!
ana begad ba7ayeeeki 3ala el decession eli enty 5adteeeh , its not easy , but its the right thing .. la2en el beet aham , in all cases , eli enty 3amlateeh da 3een el 3a2l
and 4 gurls .. ana ba7is eny momken a23od fel beet we a7is eny fe Qemet el naga7 .. law shayfaa gozy nage7 , w beyrga3 el beet ye3raf yerta7 ba3d yomo el tawel ..
mesh yerga3 yela2eny lesa marge3tesh !!!
imagine keda law ro7ty enty fe safareyya ma3a el team beta3ek 2 weeks
mate2la2esh , rabbena haywafa2ek fe 7aga latifa isA, wel work hours beta3et-ha tekon ma32olaaa
Dina Abdul Wahab Said:
February 26th, 2010 at 9:40 pm
السلام عليكم
أولا ياسينار أنا قريت كلامك عن نفسك و عن أحمد ربنا يحفظكم لبعض يارب و تفضلوا كدة دايما
ثانيا أنا متزوجة داخلة على 3 سنين ان شاء الله و خريجة علوم كمبيوتر و طموحة جدا طول عمري بعد مااتخرجت خدنت منحة زيك و بعدها يادوبك اشتغلت 4 شهور و اتجوزت هههههه يعني مالحقتش أعمل خبرة خالص و من ساعتها و أنا فرحانة اني اتجوزت لكن حاسة ان ممكن ماأحققش اللي نفسي فيه فقررت أشتغل من البيت لكن المشكلة موضوع الخبرة زي ماقلتي لكن الحمد لله ربينا كان بيبعتلي ناس ترضى تشغلني صحيح قليل بس كل مرة الأمل بيزيد و اشتركت في موقع أجنبي اسمه أوديسك للشغل من البيت و ربنا رزقني بعد 9 شهور بالظبط ببنتي مريم ربنا يحفظها و طبعا دي مش لعبة يعني حتى لو كنتي طموحة كل دا هيروح عشان خاطر عيون طفلك الصغير يطون في حضنك و تمليه حب و حنان لكن برضه مايأستش قررت أخد الماستر و فعلا خلصت التمهيدي دلوقتي و ربنا يسهل و ألاقي موضوع البحث و الدكتور عشان أبدأ و أنا شايفة ان سن مريم دلوقتي (سنتين) كويس جدا انها تروح حضانة لأنها ماشاء الله مليانة طاقة و مش باقدر أتحكم فيها زي الأول ههههههه و ربنا قال ان الفطام بعد سنتين و بكدة ان شاء الله هاقدر أنجز الى جانب الشغل من البيت بس عشان مانساش اللي اتعلمته مش أكتر الى ان يحين الوقت المناسب
لكن عايزة أقول للأخت اللي اتكلمت عن قدرات أختها ان في فعلا كدة مامتي كدة و طبيبة برضه الظاهر هو دا السر ههههههه لا طبعا هي قدرات و مش لازم دا يحبطك مامتي لما بتقعد تتكلم عن نشاطها و كسلي أنا ههههههه باقعد أقلها ماتقارنيش نفسك بحد كل واحد فيه مميزات و عيوب و قدرات مختلفة عن الأخرين
لكن ياسينار الحق ان في دول أوروبا بعد ماكانوا بيشجعوا عمل المرأة و المساواة بدأوا يتراجعوا و يشجعوا على العمل من البيت عشان بجد مسؤوليات المرأة أكتر مش حكاية ان الرجل عنده قدرات أكتر لا الرجل خاصة الشرقي مش بيعمل حاجة غير الشغل برة البيت لكن هل بيساعدك في البيت لا طبعا الاماندر
و بعد ماوزارة التنمية البشرية عملت مبادرة اسمها بيتك مكتبك و حاولت تشجع المؤسسات سواء الحكومية أو الخاصة انها تساعد المرأة على تأدية واجبها الأساسي اتجاه أسرتها لم توفق الوزارة طبعا للأسف لأن القطاع الخاص رده دايما لو مش تقدر تسيب الشغل مافيش مرونة مع انه ممكن بسهولة الشغل يكون بالساعة للرجل و المرأة على السواء حسب ظروف الشخص لأن في رجل في مرحلة الماجستير مثلا و محتاج انه يشتغل بارت تايم عشان يقدر يدرس و يعمل البحث
أتمنى بجد ان المبادرة تفعل من خلال أي مؤسسة خاصة و يتم اعلان نجاحها في شغلها بهذه الطريقة فتعطي دفعة لبقية المؤسسات لتقليدها
أقلك خلي عندك أمل مافيش مستحيل
و أقلك كمان ماتيجي نعمل شركة كلها سيدات و نشغل نفسنا بارت تايم حتى لو كنا مبتدأين
دا حلمي على فكرة و مين عارف يمكن أحققه
أتمنى أن نكون على اتصال
أختك الكبيرة
دينا